భారవితో భాసించిన e-తెలుగు సమావేశం

ఈ ఆదివారం జరిగిన e-తెలుగు సమావేశానికి విచ్చేసిన ప్రముఖ సినీ రచయిత జె.కె. భారవి తన అంతరంగాన్ని మాతో పంచుకున్నారు. ఆద్యంతం ఆసక్తికరంగా సాగిన ఈ చర్చలో సినిమా రంగంపై తనకున్న అభిప్రాయాల్ని నిష్కర్షగా, నిర్మొహమాటంగా వెల్లడించారు. సమాజంపై సినిమాల ప్రభావం గురించీ, సార్వజనీనమైన సినిమా కళ ద్వారా ప్రజలను మంచి మార్గంవైపు మళ్ళించాల్సింది పోయి, అర్థం పర్థం లేని చెత్తను ఉత్పత్తిని చేస్తున్నామంటూ వాపోయారు.తమ కుటుంబం ఏడు కార్లతో విలసిల్లిన స్థితి నుంచి, ఈ సమావేశానికి షేర్ ఆటో లో వచ్చేంత స్థితికి రావడానికి గల కారణాలు,  కన్నడంలో ఆయన సినీ ప్రస్థానాన్ని గురించి సంక్షిప్తంగా వివరించారు.ఒక్క మాటలో చెప్పాలంటే ప్రసార మాధ్యమాల ద్వారా మనకు తెలియనని కొత్త భారవిని మాకు పరిచయం చేశారు.

కేవలం భక్తి సినిమాల ద్వారానే ప్రేక్షకులకు పరిచయమైన భారవి తన రచనలకున్న వైవిధ్యాన్ని కొన్ని కథలు, సంఘటనల ద్వారా పరిచయం చేశారు. సామాజిక స్పృహతో ఆయన చేసిన ఎన్నో సినిమాలు  సెన్సార్ కత్తెరకు బలయ్యాయనీ, తన భావప్రకటనా స్వేచ్ఛను హరించివేశారనీ, ఇవన్నీ ప్రచారంలోకి తీసుకురావడానికి బ్లాగులు అత్యుత్తమ సాధనంగా అభిప్రాయపడ్డారు. ఇన్నాళ్ళు కేవలం రచయితగానే ఉండి తన సామాజిక భాద్యతను నిర్వహించాలనుకున్నాననీ, ఇప్పుడు e-తెలుగు ద్వారా తన బుర్రకు పట్టిన బూజు దులుపుకుని, సాంకేతిక పరిజ్ఞానాన్ని అవగాహన చేసుకుని సరికొత్త రీతిలో ప్రజల్లోకి వెళ్ళడానికి సుముఖత వ్యక్తం చేశారు. e-తెలుగు తలపెట్టిన, ప్రస్తుతం ప్రణాళికలో ఉన్న రచయితల వర్క్ షాపుకు తనవంతు సహకారాన్ని అందించేందుకు ముందుకు వచ్చారు.

ఇంకా భవిష్యత్తులో e-తెలుగు మరిన్ని కార్యక్రమాలు చేపట్టి ప్రజలకు మరింత చేరువవ్వాలని, అందుకు కార్యనిర్వాహకుల సంఖ్యను పెంచాల్సిన ఆవశ్యకతను కూడా సభ్యులు వ్యక్తపరచడం జరిగింది. ఈ సమావేశానికి హాజరైన బ్లాగర్లు: సీబీ రావు గారు, చదువరి గారు, సుజాత గారు, చక్రవర్తి గారు, సతీష్ గారు, కశ్యప్ గారు, శ్రీనివాస కుమార్ గారు.

ఫలప్రదమైన వారాంతం

ఈ తెలుగు బ్యాడ్జీ
నా ఈ తెలుగు బ్యాడ్జీ

ఈ శనివారం, ఆదివారం భాగ్యనగరంలోని నెక్లెస్ రోడ్, పీపుల్స్ ప్లాజా లో ఏర్పాటు చేసిన ఈ-తెలుగు స్టాల్ లో వాలంటీర్ గా ఉన్నాను. సందర్శకులకు కంప్యూటర్లలో తెలుగు వాడకం గురించి తెలియజేయడం మా ప్రధాన లక్ష్యం. సందర్శకుల తాకిడి బాగా ఉండటంతో మంచి ఉత్సాహంతో వివరించాము. కొందరు ప్రముఖులు కూడా ఈ తెలుగు స్టాల్ ను సందర్శించడంతో మాకు మరింత బలాన్నిచ్చింది. అంతే కాకుండా పుస్తకం ర్యాలీ సందర్భంగా అక్కడికి విచ్చేసిన ప్రముఖులు చుక్కా రామయ్య గారికి, హాస్యనటులు జెన్నీ గారికీ, పరుచూరి వెంకటేశ్వర రావు గారికీ, టీవీ 9 రవిప్రకాష్ గారికి స్వయంగా ఈ తెలుగును గురించి వివరించడం ఇంకో మరుపురాని అనుభవం.

ఇప్పటి దాకా కేవలం బ్లాగుల ద్వారానే పరిచయమైన చాలా మంది బ్లాగర్లను వ్యక్తిగతంగా కలుసుకోవడం మరో విశేషం.  మా బాధ్యతలన్నీ నిర్వహిస్తూ కూడా మధ్యలో ఎన్నో సరదాల సరిగమలు నాకు మధురమైన జ్ఞాపకాలుగా మిగిలిపోతాయి. చాలా కాలం తర్వాత వారాంతం ఫలప్రదంగా గడిపినందుకు సంతోషంగా ఉంది.

బ్లాగర్ల సమావేశం విశేషాలు

గత ఆదివారం హైదరాబాద్ లోని కృష్ణకాంత్ ఉద్యానవనంలో తెలుగు బ్లాగర్ల సమావేశానికి హాజరయ్యాను. దాని విశేషాలు ఇది వరకే కొద్ది మంది రాశారు. కానీ నా మాటల్లో మళ్ళీ

ఇది వరకు ఏదైనా కార్యక్రమానికి వెళ్ళాల్సి వస్తే ఒక పావు గంట ముందుగా వెళ్ళే వాణ్ణి. కానీ ఈ మధ్య ఎక్కడికి వెళ్ళినా ఖాళీ వేదికలు వెక్కిరిస్తుండటంతో ఈ సారి వీఐపీలాగా ఒక పావుగంట లేటుగా వెళ్దామని వెళ్ళాను. అయితే అప్పటికే ఓ పది మంది కూర్చుని ఉన్నారు.

నాకు ఇది వరకే పరిచయం ఉన్న చదువరి గారు మొదలైనవాళ్ళు కనిపించారు. వచ్చిన వాళ్ళు చాలా మంది కొత్త వాళ్ళే అయినప్పటికీ కొద్ది మంది బ్లాగు ద్వారా పరిచయమైన వారు కనిపించారు. కొద్ది సేపటి తర్వాత పరిచయ కార్యక్రమాలు ప్రారంభించాం. ఇవి అయిపోగానే ఈ-తెలుగు అధ్యక్షులు దుర్వాసుల పద్మనాభం గారు ఈ సంవత్సరం పీపుల్ ప్లాజాలో జరగబోయే ఈ-తెలుగు స్టాల్ కు వాలంటీర్ల సహాయాన్ని కోరారు. ఈ తెలుగు సెక్రటరీ కశ్యప్ గారికి తమ సౌలభ్యాన్ని తెలియబరచాల్సిందిగా కోరడం జరిగింది. తరువాత సుజాత( మనసులోమాట బ్లాగరి) గారు బ్లాగర్ లో కామెంట్స్ లో తాను ఎదుర్కొంటూన్న సమస్య గురించి ప్రస్తావించారు. ఇంకా కొన్ని టెక్నికల్ విషయాల గురించి కూడా చర్చ జరిగింది.

అయితే తెలుగు బ్లాగర్ల దినోత్సవం అనగానే ఎక్కువ మందిని వ్యక్తిగతంగా కలవచ్చనే ఆశతో వచ్చిన వాళ్ళు కొంతమంది నిరాశ చెందడం కనిపించింది, నాతో సహా 🙂

సమావేశం ముగిసిన తర్వాత అందరూ గుంపులుగా చేరి కాఫీ తాగుతూ కాసేపు కొన్ని తెలుగు బ్లాగుల పోకడలపై( ఏ బ్లాగులు అని మాత్రం అడక్కండి : అవి మీకు తెలుసు! నాకు తెలుసు!!) ) సరదా సరదా కబుర్లు చెప్పుకున్నాం. సుజాత గారు ఇంటికి వెళుతూ తన కార్లో నాకు లిఫ్టిచ్చారు. థాంక్స్ సుజాత గారూ!!!”

సమావేశానికి హాజరైన వారు:

దుర్వాసుల పద్మనాభం గారు, సీబీరావు గారు, వీవెన్ గారు, చదువరి గారు, చక్రవర్తి గారు, రవిగారు, సుజాత గారు, వెంకటరమణ గారు, విజయ్ శర్మ గారు, రాజన్ గారు, అజయ్ గారు, క్రిష్ణ కిషోర్ గారు, కోడిహళ్ళి మురళిమోహన్ గారు, కశ్యప్ గారు, మురళీధర్ గారు, సుజ్జి గారు, శ్రీనివాస రాజు గారు, శ్రీనివాస కుమార్ గారు, ఆంధ్రలేఖ నుంచి ప్రతినిథి సత్యనారాయణ తదితరులు హాజరయ్యారు.

వీరి బ్లాగుల వివరాలకోసం విజయశర్మ గారి టపా చూడండి.

తెలుగు బ్లాగుల దినోత్సవం, భాగ్యనగరం ఫోటోలు

పెద్ద ఫోటోలుగా చూడాలంటే ఫోటో మీద నొక్కండి.

తెలుగు బ్లాగుల దినోత్సవం-1
తెలుగు బ్లాగుల దినోత్సవం-1

తెలుగు బ్లాగుల దినోత్సవం-2
తెలుగు బ్లాగుల దినోత్సవం-2
తెలుగు బ్లాగుల దినోత్సవం-౩
తెలుగు బ్లాగుల దినోత్సవం-౩