నూతన సంవత్సర శుభాకాంక్షలు

నూతన సంవత్సర శుభాకాంక్షలు

మిత్రులందరికీ శుభాకాంక్షలు. నూతన సంవత్సరంలో మీకు అన్నీ శుభాలే కలుగుతాయని గ్యారంటీ ఇవ్వలేను కానీ, ఎటువంటి పరిస్థితినైనా ఎదుర్కోగల శక్తిని మీకు ఆ దేవుడు ప్రసాదించాలని మనస్పూర్తిగా ప్రార్థిస్తున్నాను. 🙂

శుభం భూయాత్!

ఈ-తెలుగు స్టాల్ కొసమెరుపులు

e-తెలుగు బృందం
e-తెలుగు బృందం

నిన్నటితో హైదరాబాద్ పుస్తక ప్రదర్శన ముగిసింది.దాంతో పాటూ e-తెలుగు స్టాల్ కూడా. చివర్లో మేం చేసిన సందడి గురించి చెప్పకపోతే కొన్ని మధుర క్షణాలు కోల్పోయినట్లే. గతేడాది పద్మనాభం గారు మొదలు పెట్టిన సాంప్రదాయం ఈ సారీ కొనసాగించాం. స్టాల్ తెర మూసేసి లోపల గా……………..ట్టిగా జాతీయ గీతాన్ని ఆలపించాం. అలాగే స్టాల్ నిర్వహణలో సహకరించిన అందరికీ గా……….ట్టిగా ఓయేసుకున్నాం.

అంతటితో ఆగకుండా ప్రదర్శన బయటకు వచ్చి టీమిండియా విజయోత్సవం లాగా అందరం చేతులమీద చేతులేసుకుని గుంపుగూడి గా…ట్టిగా మా తెలుగు తల్లికి గీతాన్ని ఆలపించాం. మా చుట్టుపక్కల ఉన్నవాళ్ళు మమ్మల్ని ఆసక్తిగా గమనించడం కనిపించింది. మొత్తమ్మీద గత ఏడాది కన్నా ఈసారి ఎక్కువ మంది ప్రజల్లోకి వెళ్ళగలిగినందుకు అందరూ సంతృప్తి చెందారు.

ఎంత మంది మిత్రులో…

నాకు ఉద్యోగం వచ్చినపుడు, నా నియామక పత్రంలో  బెంగుళూరులో చేరతారా? హైదరాబాద్ లో చేరతారా? అని అడిగారు. బెంగుళూరులో ఎంత మంది బంధువులున్నా నేను భాగ్యనగరాన్నే ఎంచుకున్నాను. ఎందుకంటే ఇక్కడైతే బాగా తెలుగు వినొచ్చు, మాట్లాడచ్చని నా ఆశ. చిన్ననాటి మిత్రులు, బంధువులు అందరూ బెంగుళూరులోనే ఉండటం వల్లా, మా స్వస్థలం శ్రీకాళహస్తి నుంచి బెంగుళూరు కేవలం ఆరుగంటల ప్రయాణమవడం మూలాన  మా ఇంట్లో వాళ్ళంతా అక్కడికే వెళ్ళమన్నారు. నేను మాత్రం అవన్నీ కాదని హైదరాబాద్ కే వచ్చేశాను.

ఒక సంవత్సరం దాకా నిస్తేజంగా గడిచిన నా జీవితంలోకి ఆరునెలల క్రితం బ్లాగు ప్రవేశించింది. తద్వారా బ్లాగర్లతో కలిగిన పరిచయాలు, వారి ద్వారా ఈ-తెలుగు పరిచయం, పుస్తక ప్రదర్శన ద్వారా వందల మందికి స్వయంగా కంప్యూటర్లలో తెలుగును స్వయంగా పరిచయం చేయడం, ఇదే ప్రదర్శనలో నేను ఇప్పటి దాకా టీవీలో మాత్రమే చూసిన కొంతమంది ప్రముఖులను, రచయితలను, రచయిత్రులను, విలేఖరులను స్వయంగా కలవడం అంతా కలలా జరిగిపోయింది. ప్రదర్శనకు వచ్చి మేము చెప్పే విషయాలు ఆసక్తిగా విన్న చాలా మంది అభిమానం, ఉత్సాహం, గౌరవం, భవిష్యత్ కార్యాచరణకు కావల్సిన బోలెడంత శక్తి నిచ్చింది. ఇప్పుడు నాకు హైదరాబాద్ లో నాకు బోలెడు మంది స్నేహితులున్నారు. అంతే కాదు నా బ్లాగుకు క్రమం తప్పకుండా వచ్చి చదివి తమ అభిప్రాయాలు వ్యక్తపరిచేవారు చాలా మంది మిత్రులయ్యారు. నేనో కొత్త ప్రపంచంలోకి ప్రవేశించడానికి సహకరించిన మీ అందరికీ పేరు పేరునా ధన్యవాదాలు.


ప్రముఖులతో కళకళ లాడిన ఈ-తెలుగు స్టాల్

నిజానికి నేను ఈ వారాంతం మా ఊరు వెళ్ళవలసింది. గురువారం బంద్ కారణంగా బస్సులు నిలిపివేయడంతో ఇక్కడే ఉండి పోవలసి వచ్చింది. నేను ఈ ముడు రోజులు ఈ-తెలుగు స్టాల్ లో వాలంటీర్ గా పనిచేయడం భగవత్సంకల్పం కాబోలు.

ఈ రోజు స్టాల్ ను సందర్శించిన వారిలో ప్రముఖ పాటల రచయిత, జాతీయ పురస్కారం గ్రహీత సుద్దాల అశోక్ తేజ గారు, ప్రముఖ రచయిత, మెజీషియన్, వ్యక్తిత్వ వికాస నిపుణులు బీవీ పట్టాభిరాం గారు, శాసన సభ్యులు మండలి బుద్ధ ప్రసాద్ గారు ముఖ్యులు. వీరు స్వయంగా ఈ-తెలుగు స్టాల్ ను సందర్శించి కంప్యూటర్లలో తెలుగు వాడకాన్ని ఆసక్తిగా తిలకించారు. సుద్దాల అశోక్ తేజ గారు తాను పుస్తక ప్రదర్శనకు వచ్చి ఒక విలువైన విషయాన్ని తెలుసుకొన్నాననీ, “అంతర్జాలంలో తెలుగు నన్ను ఇంద్రజాలం చేసింది” అని తమ సంతోషాన్ని వ్యక్తం చేశారు. అలాగే మండలి బుద్ధ ప్రసాద్ గారు  ప్రభుత్వం తరపున ఈ-తెలుగుకు కావల్సిన సహాయం చేసేందుకు ముందుకు వచ్చారు. బీవీ పట్టాభిరాం గారు కూడా తమ ఫోన్ నంబర్ ఇచ్చి స్వయంగా ఆఫీసుకు వచ్చి కలవ మన్నారు. ఇంకా ఎందరో సందర్శకులు స్టాల్ ను సందర్శించినందకును తమ ఆనందాన్ని వ్యక్తం చేశారు. అధ్యాపకులు, రచయితలు, విలేఖర్లు ఇలా అనేక రంగాలకు చెందిన వ్యక్తులు స్టాలును నిర్వహిస్తున్న వారికి తమ అభినందనలు తెలియజేశారు.

ప్రముఖ రచయిత బీవీ పట్టాభిరాం గారు
ప్రముఖ రచయిత బీవీ పట్టాభిరాం గారు

స్టాల్ ను సందర్శించిన సుద్దాల అశోక్ తేజ గారు
నేను, అశోక్ తేజ గారు, సతీష్ గారు, "మంచి పుస్తకం" స్టాలు నడుపుతున్న ప్రసాద్ గారు
నేను, అశోక్ తేజ గారు, సతీష్ గారు, "మంచి పుస్తకం" స్టాలు నడుపుతున్న ప్రసాద్ గారు
శాసన సభ్యులు మండలి బుద్ధ ప్రసాద్ గారు
శాసన సభ్యులు మండలి బుద్ధ ప్రసాద్ గారు